Америкийн Meta, Энэтхэгийн Reliance Industries компаниуд хамтарч хүнс хүргэлтийн аппликейшн хөгжүүлж байна. Уг апп нь WhatsApp мессеж үйлчилгээнд суурилах бөгөөд Марк Закерберг Энэтхэг дэх харилцаагаа бэхжүүлж буй дахин нэг том жишээ боллоо.
Reliance-ийн эзэмшдэг JioMart апп нь Энэтхэгт хүнс, хувцас, ахуйн бараа хүргэлтээр худалддаг цахим дэлгүүр бөгөөд 10,000 гаруй ажилтантай том платформ юм. Facebook анх 2020 онд тус компанид 6 тэрбум ам.долларын хөрөнгө оруулснаар тэдний хамтын ажиллагаа эхэлсэн. Reliance-ийн ТУЗ-ийн дарга, хөрөнгийн хэмжээгээрээ дэлхийд 10 дугаарт жагсаж буй Мукеш Амбани “Марк бид хоёр улам олон хүн, бизнесийг онлайн ертөнцөд нэгтгэхийг зорьж байна. Бид Энэтхэгийг дэлхийд тэргүүлэгч дижитал үндэстэн болгохын төлөө хамтран ажиллах болно” хэмээн өгүүллээ.
Reliance ийнхүү хүнс хүргэлтийн салбараа тэлэхийн зэрэгцээ Энэтхэгт 5G сүлжээ нэвтрүүлэх ажилд 25 тэрбум ам.долларын хөрөнгө зарцуулж байна. Энэ бүх хөгжлийг удирдаж буй 65 настай Амбани бизнесийн эзэнт гүрнээ хүүхдүүддээ аажим шилжүүлж байна. Тэрбээр ууган хүү, өдгөө 30 настай Акашдаа 5G сүлжээний үүрэн холбооны компанийнхаа удирдлагыг зургаадугаар сард залгамжлуулсан билээ.
Эх сурвалж: Forbes