Ням гарагт АНУ-ын ерөнхийлөгч Жо Байден Хятадын талаас Тайвань руу дайрваас АНУ Тайванийг хамгаалах болно хэмээн мэдэгдсэн билээ. Тэгвэл түүний мэдэгдлийн хариу болгож БНХАУ-ын Гадаад хэргийн яамны хэвлэлийн төлөөлөгч Мао Нинг мэдэгдэл хийжээ.
Мао Нингийн хэлснээр, “Хятад үндэстнийг хагалан бутаргах гэсэн аливаа үйл ажиллагааны эсрэг шаардлагатай арга хэмжээг авах эрх БНХАУ-д бий. Бидний зүгээс энх тайвнаар эргэн нэгдэхийн төлөө чадах бүхнээ хийхэд бэлэн байгаа ч салан тусгаарлах зорилготой аливаа үйл ажиллагааг тэвчихгүй.
Дэлхийд зөвхөн нэг л Хятад улс бий. Тайвань бол Хятадын нэг хэсэг. БНХАУ-ын засгийн газар бол Хятадын цор ганц, хууль ёсны засаг төр” гэсэн байна.
Тийнхүү мэдэгдлийн хүрээнд тэрээр АНУ-ыг Тайваньтай холбогдолтой асуудалд зөвөөр, болгоомжтой хандаж, Тайванийн салан тусгаарлагч хүчинд буруу ойлголт төрүүлэхгүй байхыг хүсжээ.
Эх сурвалж: The Reuters