БНХАУ-ын дарга Ши Жиньпинийг гурван дахь удаагаа улиран сонгогдох эсэхийг шийдэх Хятадын Коммунист намын ХХ их хурал хэдхэн цагийн дараа Бээжин хотын Ардын их хурлын ордонд нээлтээ хийнэ.

Намын ерөнхий нарийн бичгийн дарга Ши Жиньпин 2017 онд болж өнгөрсөн намын XIX их хурлаас хойших намын ололт амжилт, цаашдын бодлого төлөвлөгөөний талаарх тайланг улс орон даяар бүс нутаг, салбар бүрээс сонгогдсон намын их хурлын 2200 төлөөлөгчийн өмнө тайлагнах учиртай.

Намын их хурлаар төлөөлөгчид ирэх таван жилд БНХАУ-ыг улсыг удирдах 200 орчим шинэ Төв хорооны гишүүд болон Сахилгын төв хяналтын газрын гишүүдийг сонгох юм.

Ирэх долоо хоногийн сүүлчээр хуралдах намын их хурлын хаалтын өдөр Төв хорооны шинэ гишүүдийн нэрс бүрэн бүрэлдхүүнээрээ тодрох үед Ши Жиньпиний гурав дахь бүрэн эрхийн хугацаа нь албан ёсоор хэрэгжиж эхлэх төлөвтэй байгаа юм.

Хэрэв Ши дарга энэ удаагийн намын их хурлаар Ерөнхий нарийн бичгийн даргаар улиран сонгогдсон тохиолдолд 1978 онд өөрчлөлт шинэчлэлтийн бодлого хэрэгжиж эхэлснээс хойш гурав дахь удаагаа улиран сонгогдсон Хятадын анхны дээд удирдагч болно.

Эх сурвалж: MBC