Pfizer Inc компани АНУ-ын засгийн газарт вакцин нийлүүлэх гэрээнийх нь хугацаа дууссаны дараа коронавирусын эсрэг вакциныхаа үнийг ойролцоогоор дөрөв дахин нэмэгдүүлэхээр бэлдэж байна.
Улмаар нэг тун Pfizer вакцин 110-130 ам.доллар болно хэмээн тус компанийн гүйцэтгэх захирал Анжела Лукин аравдугаар сарын 20 өдөр мэдэгдлээ. Өнөөдрийн байдлаар вакцины эрэлт сул байгаа нь үнэ өсөхөд нөлөөлсөн аж. Вакцин үйлдвэрлэгчид 2023 оноос хойших орлогын төлөвлөгөөгөө биелүүлэхийн тулд ийнхүү үнээ нэмэх шаардлагатай болж байгаа аж. Америкт бүх нийтэд үнэ төлбөргүй хийж буй тус вакциныг 2023 онд гэрээ шинэчлэгдсэний дараа зөвхөн даатгалтай иргэдэд төлбөргүй хийх боломжтой гэж компанийн зүгээс үзэж байна. Цаашид ковидын зах зээл нь насанд хүрэгчдэд хийдэг жил тутмын томуугийн эсрэг вакцины одоогийн зах зээлтэй ойролцоо хэмжээтэй байх болно гэж Pfizer таамаглалаа.
АНУ өдгөө Pfizer Inc болон түүний Герман дахь түнш BioNTech SE компаниудад нэг тун тутамд 30 орчим ам.доллар төлдөг. АНУ-ын нийгмийн эрүүл мэндийн онцгой байдлын хугацаа 2023 оны эхний хагаст дуусна. Үүнээс хойш даатгалгүй иргэд хэрхэн вакцин хийлгэх тухай мэдээлэл байхгүй. BioNTech өдгөө хорт хавдрын эсрэг вакцин бүтээхээр өндөр амжилттай ажиллаж байна.
Эх сурвалж: Reuters