ХБНГУ-д нэгэн бүсгүй гэр бүлийн асуудлаас болж өөртэйгөө яг адилхан харагддаг нэгнийг хөнөөн өөрийнхөө үхлийг зохиомлоор үйлдэхээр оролдсон байж болзошгүй хэрэг гарчээ. Энэ талаар холбогдох албанаас мягмар гарагт мэдээлсэн байна.

Өдгөө 23 настай, герман-ирак гаралтай бүсгүйн хувьд өнгөрөгч оны наймдугаар сард алга болсон хүмүүсийн жагсаалтад бүртгэгдээд байсан бөгөөд цагдаа нар түүнийг хайж явцдаа бүсгүйн машиныг осолдсон байдалтай олжээ. Машиныг олоход түүний машин дотор нэгэн цогцос байсан юм.

Тийнхүү цогцсыг олсны дараагаар мөрдөн байцаагч нарын зүгээс цогцсыг машины эзэн болох герман-ирак гаралтай бүсгүйн цогцос хэмээн таамагласан байна. Харамсалтай нь цогцсыг хэд хэдэн удаа хутгалж, царайг нь эрэмдэглэсэн байсан тул тэд цогцос хэнийх болохыг шууд хэлэх боломжгүй байсан юм. Улмаар шүүх эмнэлгээс шинжилгээ хийхэд цогцос нь алга болсон бүсгүйн цогцос биш болохыг тогтоожээ.

Тодруулбал, цагдаа нарын олсон машин алга болсон бүсгүйнх мөн байсан бол цогцос 23 настай, алжир бүсгүйн цогцос байсан юм. Хачирхалтай нь хоёр бүсгүй хоорондоо туйлын адилхан харагддаг байжээ.

Үйл явдлын хүрээнд цагдаагийн албаныхан герман-ирак гаралтай бүсгүйг наймдугаар сарын 18-ы өдөр олж, баривчилсан байна. Тийнхүү өнгөрөгч сарын 26, 27-ы өдрүүдэд шүүхээс түүний эсрэг хэрэг үүсгэн шалгаж эхэлжээ.

Цагдаа нарын таамаглаж байгаагаар бүсгүй өөрийн үхлийг зохиомлоор үйлдэхийн тулд өөртэйгөө адилхан нэгнийг санаатайгаар хөнөөсөн байж болзошгүй юм.

Эх сурвалж: CNN