Германы Дортмунд хотын хөл бөмбөгийн “Боруссиа” баг Францын “Пари Сен Жермен”-ийг талбай дээр нь хожсоноор Аваргуудын лигийн финалын тоглолтод шалгарлаа.
Парис хотод болсон тоглолтод зочин багийн хөлбөмбөгчид талбайн эздийг 1:0 харьцаагаар ялснаар хоёр тоглолтын нийлбэр дүнгээр шувтаргын тоглолтод оролцох эрхтэй болсон байна. “Боруссиа”-гийн хамгаалагч Матс Хуммельс тоглолтын 50 дахь минутанд цорын ганц гоолыг оруулжээ.
Өмнө нь 5 дугаар сарын 1-нд Дортмунд хотод болсон эхний тоглолтод талбайн эзэд мөн 1:0 харьцаагаар ялалт байгуулсан юм.
Ташрамд дурдахад, Парисын клубын хөлбөмбөгчид Аваргуудын лигийн хасагдах шатны тоглолтуудад шинэ өвөрмөц дээд амжилт тогтоож, нэг тоглолтын явцад хаалганы шонг дунджаар 4 удаа онож, дунджаар 30 удаагийн цохилт нь бүтэлгүйтжээ.
Өнөөдөр болох хоёр дахь хагас шигшээ тоглолтод Мюнхений “Бавариа” баг “Реал”-тай Мадрид хотноо тоглох бөгөөд эхний тоглолт 2:2 харьцаатай тэнцээгээр өндөрлөсөн юм.
Харин Аваргуудын лигийн финалын тоглолт 6 дугаар сарын 1-ний өдөр Лондон хотын “Уэмбли” цэнгэлдэх хүрээлэнд болно. Өмнө нь “Боруссиа” багийн хөлбөмбөгчид 1997 онд Италийн “Ювентус”-ыг ялснаар Аваргуудын лигийн цомыг өргөж байсан бол 2013 оны финалд “Бавариа”-д ялагдаж байжээ.
Эх сурвалж: РИА Новости /МОНЦАМЭ агентлаг/