Цөмийн хөтөлбөрөөсөө болж барууны орнуудтай хурцадмал харилцаатай байгаа Иран улс орон нутгийн цагаар 25-ны өдөр “Корамшар-4” нэртэй шингэн түлш ашигладаг баллистик пуужингаа танилцууллаа.

Мөн өдөр Ираны нийслэл Тегеран хотноо зохион байгуулагдсан арга хэмжээний үеэр ачааны машин дээрх харвах төхөөрөмж дээр суурилуулсан “Корамшар-4” пуужинг танилцуулсан байна. Ираны Батлан ​​хамгаалахын сайд Мохаммад Реза Аштиани хэлэхдээ тус пуужинг ойрын хугацаанд хөөргөхөд бэлэн болно хэмээн мэдэгджээ.

Ираны албаныхны мэдээлснээр пуужин 2000 километрийн тусгалтайн дээр 1500 килограммын цэнэгт хошуутай аж. Мөн пуужинг амжилттай хөөргөж буй дүрс бичлэгийг энэ үеэр олон нийтэд дэлгэсэн бөгөөд яг хэзээ уг туршилтыг хийсэн талаар ямар нэгэн мэдээлэл хүргээгүй байна.

"Корамшар-4" нь 1980-аад онд Иран-Иракийн дайны үеэр ширүүн тулаан болж байсан Ираны хотын нэрээр нэрлэсэн аж.

Ираны зүгээс ийнхүү шинэ баллистик пуужингаа танилцуулсан явдал нь бүс нутгийн хурцадмал байдалтай холбоотой бололтой. Еврейчүүдийн “Ариун сүм уул" гэж нэрлэдэг Ислам ба иудаизмын аль алиных нь ариун газар болох Аль-Акса сүмийн байранд байрлах Иерусалимын алтан "Хадны бөмбөгөр"-ийн бяцхан зураг хөөргөх тавцангийн дэргэд байгаа нь ихээхэн анхаарал татсан юм.

Иран улс Израилийг хамгийн том дайсан хэмээн үздэг бөгөөд Палестины нутаг дэвсгэр болон хөрш зэргэлдээ орнууд дахь Израилийн эсрэг дайчдыг өдгөө гол зэвсгээр хангагч болоод билээ. Ялангуяа Ираны зэвсгийн үйлдвэрлэл урьд өмнөхөөсөө хамаагүй ахисан түвшинд очсоноос гадна тус улс уран баяжуулж байгаа энэ үед хоёр улсын хурцадмал байдал улам даамжирч буйг дэлхий нийт харж байгаа билээ. “Корамшар-4” пуужин Израилийн нутагт хүрэх боломжтой хэмээн шинжээчид үзсэн байна.

Энэхүү пуужинг Умард Солонгосын “Мусудан” баллистик пуужингаар загварчлан хийсэн ажээ.

Эх сурвалж: Newsis