2013 он гэхээр сэтгэлд нэг ойрхон санагдах ч багахан тооцоолол хийгээд үзвэл аль хэдийн 11 жил өнгөрчээ. Тус хугацаанд криптовалютын зах зээлд олон ч онцлох үйл явдал болсон билээ.

Тэгвэл бид энэ удаагийн мэдээгээрээ 2013 онд хүмүүсийг 1 ам.долларт тэнцэх хэмжээний биткоин худалдан аваач гэж гуйж, уриалж байсан эр өдгөө хэрхэн амьдарч буйг сонирхуулъя.

Давинчи Жереми бол YouTube суваг хөгжүүлэгч, биткоин, криптовалют сонирхогч. Түүний хувьд криптовалютын үнэ цэнийг олон нийтээс арай эрт ойлгосон байсан тул 2013 онд өөрийн дагагчдаа ердөө 1 ам.долларт тэнцэх хэмжээний биткоин худалдан аваад хадгалаач хэмээн гуйж байсан нэгэн юм.

Гэсэн хэдий ч тухайн үед түүний гуйлтыг биелүүлсэн хүн цөөн.

Сонирхуулахад тухайн үед нэгж биткоин ердөө 116.75 ам.долларын үнэтэй байсан билээ. Харин өдгөө тус коины үнэ 65,000-70,000 ам.долларт хэлбэлзэж буй. Өнгөрсөн сард дээд талдаа нэг биткоины үнэлгээ 73,573.91 ам.долларт хүрээд эргэн унасан.

Тэгвэл тэр өдгөө биткоины ачаар хангалттай чинээлэг амьдрах болжээ. Хэвлэлийнхний мэдээлж байгаагаар Давинчи нийт 3,000 нэгж ширхэг биткоин эзэмшдэг бөгөөд үүнээс тооцвол тэр өдгөө ам.долларын саятан болсон юм. Гэвч энэ хэмжээний хөрөнгийг тэрээр ердөө 100 хүрэхгүй ам.доллароос эхлэн босгосон гэхээр хэн ч үнэмшихээргүй мэт.

Үйл явдлын хүрээнд түүний бичлэг дор хүмүүсийн үлдээсэн сэтгэгдлээс сонирхвол, “Би энэ залуугийн бичлэгийг YouTube дээрээс үзэж байсан. Тэр бичлэг дээр тэрээр 10 хүрэхгүй еврогоор 2,600 биткоин авч байж билээ”, “Би түүнийг гуйж байхад л биткоин авахаар картын мэдээллээ оруулж байсан. Гэхдээ миний ашиглаж байсан биржийн сервер унаад байхаар нь би гүйлгээгээ шууд тасалчихсан юм даа” гэх зэргээр бичжээ.

Эх сурвалж: UNILAD