Шинжээчдийн хэлж байгаагаар энэ онд БНХАУ-ын гангийн экспорт сүүлийн 7 жилийн хугацаан дахь дээд хэмжээнд хүрэх төлөвтэй байна гэжээ. Үүний учир нь юанийн ханш суларч, БНХАУ-д гангийн эрэлт буурч байгаа юм.
Тодруулбал, Ройтерс агентлагаас мэдээлж байгаагаар БНХАУ-ын үл хөдлөх хөрөнгийн салбар уналтад орсон нь гангийн дотоод дахь эрэлтийг буурахад нөлөөлсөн бөгөөд эрэлт буурснаар тэд их хэмжээгээр ган экспортолж байгаа гэнэ. Харин импортлогч орнууд Хятадын ганг сонгоход нөлөөлж байгаа гол хүчин зүйл нь тэд өрсөлдөхүйц хямд үнийг санал болгож байгаатай холбоотой ажээ.
Улмаар энэ оны эхний таван сарын хугацаанд экспортолсон гангийн хэмжээг өнгөрөгч оны мөн үед экспортолсон гангийн хэмжээтэй харьцуулахад 41 хувиар илүү байсан нь шинжээчид экспортыг сүүлийн 7 жилийн хугацаан дахь дээд хэмжээнд хүрнэ гэж таамаглахад нөлөөлсөн байна.
Эх сурвалж: The Reuters