Туркийн ерөнхийлөгч Режеп Тайип Эрдоган орон нутгийн цагаар 10-ны өдөр хэлэхдээ, хэрэв Европын холбооны томоохон орнууд манай улсыг тус холбоонд элсэх тал дээр хамтран ажиллавал Шведийг НАТО-д элсүүлэхийг зөвшөөрнө хэмээн мэдэгдсэн байна.
Тодруулбал ерөнхийлөгч Эрдоган НАТО-гийн дээд хэмжээний уулзалтад оролцохоор явахаасаа өмнө сэтгүүлчдэд хандан хэлэхдээ "Юуны өмнө Туркийг Европын холбоонд элсэх замыг нээлттэй болгох хэрэгтэй байна. Үүний дараа бид Шведийг НАТО-д элсэх замыг нээхэд бэлэн” хэмээн цохон тэмдэглэснийг Ройтерс, Франс Пресс зэрэг агентлагуудын мэдээлжээ.
Өмнөх өдөр нь ерөнхийлөгч Эрдоган АНУ-ын ерөнхийлөгч Жо Байдентай утсаар холбогдох үеэрээ “Турк улсын зүгээс манай улсыг Европын холбоонд бүрэн эрхт гишүүнээр элсэх үйл явцыг сэргээхийг уриалах ба Европын холбооны томоохон улс орнууд болон удирдагчид энэ удаагийн НАТО-гийн дээд хэмжээний уулзалтаар Туркийг гишүүнээх элсэх үйл явцыг дэмжиж өөрсдийн үгийг хэлнэ гэж найдаж байна” хэмээн өгүүлжээ.
Тус улс нь 2004 онд Европын холбоонд гишүүнээр элсэх нэр дэвшигчийн статустай болж байсан ба 2005 онд элсэх хэлэлцээ эхэлсэн ч Киприйн маргаан болон зарим гишүүн орнуудын эсэргүүцэлтэй холбоотойгоор хэлэлцээ удааширсан байна.
Харин Швед улс НАТО-д элсэх эсэх нь өнгөрсөн оны зургадугаар сард Швед, Финлянд улсууд НАТО-д элсэхээр тохиролцсон нөхцөлөө биелүүлэх эсэхээс шалтгаална гэж ерөнхийлөгч Эрдоган өмнө нь хэлж байсан бөгөөд Туркээс бид хэнд ч “найр тавихгүй” гэдгээ тодорхой өгүүлж байсан юм.
Эх сурвалж: MBC