АНУ-ын засгийн газар Тайваньд 345 сая ам.долларын цэргийн тусламж үзүүлэхээ зарласан талаар Тайваний төв мэдээллийн агентлаг мэдээллээ.
Тус мэдээнд дурдсанаар орон нутгийн цагаар 28-ны өдөр Цагаан ордон Тайваньд 345 сая ам.доллароор хэмжигдэх цэргийн тусламж үзүүлэх төлөвлөгөөг зарласан болохыг онцолжээ.
Тодруулбал “Энэ нь Байдены засаг захиргааны зүгээс Тайваньд цэргийн дэмжлэг үзүүлэхээр шийдсэн анхны чухал төлөвлөгөө бөгөөд АНУ-ын энэхүү цэргийн хангамж нь Хятадын цэргийн заналхийллийн эсрэг тус улсад тусалж буй хэрэг юм” хэмээн дурдсан байна.
АНУ-ын засгийн газраас Тайваньд үзүүлэх уг цэргийн дэмжлэгийн төлөвлөгөөнд зөвхөн зэвсэг техник бус батлан хамгаалах салбарын боловсрол, цэргийн сургуулилалтад үзүүлэх дэмжлэг ч багтжээ.
Харин энэхүү төлөвлөгөөний хүрээнд нийлүүлэгдэх зэвсгийн нэр төрлийн талаар ямар нэгэн тодорхой мэдээлэл байхгүй байгаа юм.
Нэрээ нууцлахыг хүссэн АНУ-ын хоёр албан тушаалтны хэлж буйгаар Тайваньд зөөврийн агаарын довтолгооноос хамгаалах пуужин (MANPADS), тагнуулын болон тандалтын техникүүд, буу, пуужин зэрэг зэвсгийг өгнө хэмээн мэдэгдсэн талаар Тайванийн төв мэдээллийн агентлагийн мэдээлжээ.
Эх сурвалж: MBC