Израиль улс хамгийн сүүлийн үеийн пуужингийн довтолгооноос хамгаалах систем болох “Arrow-3”-ыг Германд худалдах боломжтой болжээ.
Израилийн Батлан хамгаалах яамны зүгээс мэдэгдэхдээ 3.5 тэрбум ам.доллароор хэмжигдэх “Arrow-3” агаарын довтолгооноос хамгаалах системийг Герман руу экспортлохыг АНУ-ын засгийн газар эцэслэн зөвшөөрсөн хэмээн онцлов.
Израиль болон Германы Батлан хамгаалах яамдууд ойрын хугацаанд 600 сая ам.долларын гүйцэтгэлийн гэрээнд гарын үсэг зурах төлөвтэй байгаа бөгөөд энэ оны сүүлч гэхэд хоёр улсын парламент гэрээг эцэслэн батлах аж.
Израилийн тал 2025 оны 4-р улирлаас “Arrow-3” системийг Германд нийлүүлж эхлэхээр төлөвлөсөн байна.
Тус системийг Израиль болон АНУ хамтран санхүүжүүлж, хөгжүүлж, үйлдвэрлэсэн бөгөөд химийн, биологийн болон бусад төрлийн цэнэгт хошуугаар цэнэглэгдсэн баллистик пуужингуудыг таслан зогсоох чадвартай агаарын довтолгооноос хамгаалах систем юм.
Гадаадын хэвлэл мэдээллийн хэрэгслүүдийн онцолж буйгаар энэхүү гэрээ нь Израиль улсын байгуулсан хамгийн том мөнгөн дүнтэй нэг төрлийн зэвсгийн экспортын гэрээ хэмээгээд Украины дайны улмаас Европ батлан хамгаалах чадавхиа бэхжүүлж буй үед хийгдсэн гэдгээрээ анхаарал татаж байна гэжээ.
Эх сурвалж: MBC