ОХУ-ын ерөнхийлөгч Владимир Путин, Туркийн ерөнхийлөгч Режеп Тайип Эрдоган нар ирэх сард болох НҮБ-ын Ерөнхий Ассамблейн чуулганы өмнө уулзах төлөвтэй байна гэж ТАСС агентлаг орон нутгийн цагаар 29-ний өдөр мэдээлэв.
Тодруулбал ТАСС агентлагийн Туркийн эх сурвалжаас эш татан мэдээлснээр, ирэх есдүгээр сарын 19-ний өдөр зохион байгуулагдах НҮБ-ын Ерөнхий Ассамблейн 78 дугаар чуулган эхлэхээс өмнө тус хоёр улсын тэргүүд уулзахаар төлөвлөсөн талаар онцолжээ.
Түүнчлэн Bloomberg агентлагийн мэдээлснээр ерөнхийлөгч Эрдоган “Их 20”-ын бүлгийн дээд хэмжээний уулзалтад оролцохоор Энэтхэгт айлчлахаас өмнө буюу есдүгээр сарын 8-ны өдөр ОХУ-д айлчилж магадгүй хэмээн Туркийн албаны хүмүүсийн үгнээс эш татсан байна.
Энэ удаагийн уулзалтаар хоёр улсын удирдагчид Хар тэнгисийн үр тарианы хэлэлцээрийн асуудлыг шийдвэрлэх арга замын талаар ярилцах төлөвтэй байгаа юм.
Мөн Украины хямралыг энхийн замаар шийдвэрлэх арга болон Сирийн асуудлыг хэлэлцэхээр болсон байна.
Эх сурвалж: YTN