Саяхан Амстердамын Их сургуулиас хийсэн судалгаагаар биткоины шилжүүлэг нэг бүр нэг усан сан дүүргэх хэмжээний ус зарцуулдаг гэсэн дүн гарчээ. Энэ нь банкны картаар хийдэг гүйлгээтэй харьцуулахад даруй 6 сая дахин их хэмжээний ус зарцуулдаг гэсэн үг юм.

Биткоиноор гүйлгээ хийхэд ийм их хэмжээний ус зарцуулдаг шалтгааныг тодруулбал, криптовалют нь технологи суурьтай валют учир тухайн валютыг оршин тогтнуулахын тулд дэлхий дахинаа олон сая компьютер ажиллаж байдагтай холбоотой билээ. Улмаар энэ хэмжээний усыг тэд зөвхөн компьютеруудыг тэжээлээр хангаж, хөргөхөд ашигладаг байна.

BBC сувгаас мэдээлснээр тэдний энэхүү судалгааг хийх болсон шалтгаан нь дэлхий дахинаа 3 тэрбум хүн усны хомстолд орсонтой холбоотой гэжээ.

Түүнчлэн өөр нэг судалгаагаар өнгөрөгч онд зөвхөн биткоины үйл ажиллагаанд зориулж нийт 1,600 тэрбум литр ус зарцуулсан бөгөөд энэ үзүүлэлт нь 2023 онд 2,200 гигалитрт хүрнэ гэсэн тооцоо байгаа юм.

Эх сурвалж: BBC