2020 онд хэрэглэгчдийн хамгийн их татсан аппликейшнаар ТикТок тодорчээ. Дижитал аналитикийн компани болох Апп Энниэгийн мэдээлснээр ТикТок нь Фэйсбүүк, Мэссенжер, Инстаграм, WhatsApp –ийг таталтын тоогоороо тэргүүлж, нэгдүгээр байрт шалгарсан байна.
Энэхүү судалгааг 2018 оноос хойш жил бүр явуулж байгаа бөгөөд өмнөх жилүүдэд үргэлж Фэйсбүүк компанийн харьяа аппликейшнүүд тэргүүн байрт бичигддэг байсан юм.
Ерөнхийлөгч асан Доналд Трамп өнгөрсөн жил ТикТокийг хувь хүний мэдээлэл задруулдаг гэж буруутгаж, АНУ-д тус аппликейшнийг хориглох шийдвэр гаргаж байсан ч, шийдвэр нь хараахан хэрэгжиж эхлээгүй байхад ерөнхийлөгч Жо Байден суудлаа авч, түүний зарим шийдвэрийг хүчингүй болгожээ.
Ташрамд дурдахад ТикТокийг эзэмшигч ByteDance компанийн Douyin гэх аппликейшн БНХАУ-даа хамгийн их таталттайгаар тэргүүн байрт бичигдэж, тус компани тун ч амжилттай ажиллаж байгаа юм.
Мөн өнгөрсөн долоо хоногоос ТикТок аппликейшнд Snapchat, Инстаграм, Фэйсбүүк шиг 24 цагийн дараа автоматаар устдаг “стори” талбарыг нэвтрүүлэх гэж байгааг зарлажээ.
Эх сурвалж: BCC