Өнгөрсөн долоо хоногт БНХАУ, нийслэл Бээжин хотноо хөрөнгийн бирж нээхээр төлөвлөж байгаагаа зарлаж байсан бол уг төсөл энэ ондоо багтан хэрэгжих төлөвтэй байгаа аж.
Хятадын Global Times сонинд бичсэнээр одоо үйл ажиллагаагаа явуулж буй Шанхай, Шэньжэнь хотын хөрөнгийн биржтэй харилцаа тогтооход бага зэрэг хугацаа хэрэгтэй боловч тийм ч их удахгүй болов уу гэж таамаглаж байгаагаа дурдаад Бээжингийн хөрөнгийн бирж энэ оны сүүлч эсвэл ирэх оны хавар гэхэд нээгдэнэ гэжээ.
Глобал Таймс сонины онцолсноор одоогоор идэвхтэй үйл ажиллагаа явуулж буй Шанхай, Хонконг, Шэньжэнь дэх хөрөнгийн бирж, мөн удахгүй нээгдэх Бээжингийн хөрөнгийн бирж, цаашлаад Макаогийн бүс нутагт шинээр хөрөнгийн бирж байгуулснаар дотоодын хөрөнгийн зах зээлийн тогтолцоо илүү үр дүнтэй ажиллах болно хэмээн таамаг дэвшүүлсэн байна.
Уг төсөл хэрэгжснээр Хятадын хөрөнгийн зах зээлийн олон улсад хүлээн зөвшөөрөгдөх чадварыг нэмэгдүүлж, Америкийн компаниудтай хийх санхүүгийн зохицуулалтаа чангатгахад тун сайнаар нөлөөлнө хэмээн үнэлжээ.
Эх сурвалж: YTN