ОХУ-ын Союзмультфилм Анимейшн Студийн менежментийн албаны дарга Юлиана Слащевагийн даваа гарагт мэдэгдсэнээр тус студийн зүгээс 3 жилийн хугацаанд Оросын хэд хэдэн мужид 10 сэдэвчилсэн парк байгуулахаар төлөвлөсөн ажээ.
Түүний хэлж байгаагаар, “Бид ойрын гурван жилд Оросын 10 бүсэд тус бүр нэг мультимедиа парк байгуулж өгөхөөр төлөвлөөд байгаа” гэсэн юм.
Одоогийн байдлаар энэ оны хоёрдугаар сард Союзмультфилмээс байгуулсан анхны парк Москва хотноо нээлтээ хийсэн байна. Тус парк нь маш олон интерактив үзүүлэнтэй бөгөөд виртуал орчин, хийсвэр орчин зэргийг багтаасан технологийн дэвшилтэт үзвэрүүд, 3 хэмжээст анимейшн, график системүүдийг багтаасан ажээ.
Тэдгээр орчин үеийн технологиуд нь паркт ирэх хүмүүсийг алдартай хүүхэлдэйн киноны ертөнцөд нэвтрэх гүүр болж, амь оруулсан хүүхэлдэйн баатруудтай интерактив харилцаа үүсгэх нөхцөлөөр хангах гэнэ. Тийнхүү нийт 10 парк байгуулахаар төлөвлөөд байгаагаас хоёр нь ашиглалтад орсон юм. Хоёр дахь мультимедиа парк нь энэ сард Казань хотноо үүд хаалгаа нээжээ.
Эх сурвалж: ТАСС