ЭфериумМакс криптовалютад хөрөнгө оруулагчид реалити шоуны од Ким Кардашиян, боксын тамирчин Флойд Мэйуэдер Жр, сагсан бөмбөгийн тамирчин Паул Пийрс нарын эсрэг шүүхэд гомдол мэдүүлжээ.
Олны танил эрхмүүдийн хамтаар тэд мөн тус криптовалютыг үүсгэж, зах зээлд нийлүүлсэн этгээдүүдийг ч шүүхэд дуудсан юм. Харин олны танил эрхмүүдийн эсрэг яагаад гомдол гаргах болсон тухай лавлахад, хөрөнгө оруулагч нар тэднийг ЭфериумМакс криптовалютын талаар ташаа мэдээлэл түгээж, үндэслэлгүй сурталчилгаа хийсэн гэж үзсэн байна.
Тодруулбал, тэд дээр дурдсан олны танил эрхмүүд өөрсдийн шүтэн бишрэгч, дэмжигч нарт тус криптовалютын тухай сурталчилж, коинд хөрөнгө оруулсан хүмүүс мөнгөө хэд нугалж байгаа тухай бор шувуу нисгэсэн нь коины үнийг зохиомлоор өсгөхөд нөлөөлсөн гэж буруутгаж байгаа юм. Тийнхүү ЭфериумМаксийн зах зээлийн ханш даруй 1300 хувиар өссөн ч сарын хугацаанд бүх үнэ цэнээ алджээ.
Харин ЭфериумМакс криптовалютыг нийлүүлэгчдийн зүгээс хөрөнгө оруулагч нарын хийж байгаа мэдэгдэл нь гүтгэлэг хэмээж, үнэн мөнийг шүүх тогтооно гэсэн байна.
Ташрамд дуулгахад тус криптовалютын нэр дэлхийд үнэ цэнээрээ хоёрдугаарт жагсаж буй Эфериум коинтой нэлээдгүй төстэй боловч, нийлүүлэгч байгууллага, төслийн хувьд ямар ч уялдаагүй юм.
Эх сурвалж: BBC