АНУ-д өнгөрөгч хоёр долоо хоногийн хугацаанд шатахууны дундаж үнэ галлон тутамдаа 33 центээр нэмэгдэж, нэг галлон шатахууны үнэ 4.71 ам.долларт хүрчээ.
Улмаар шатахуун боловсруулалт, нийлүүлэлтийн салбарын шинжээч Трилби Лундбергийн ням гарагт хэлснээр, шатахууны үнэ ийн өсөх болсон нь түүхий газрын тосны үнийн өсөлт болоод шатахууны нийлүүлэлт тасалдаж байгаатай холбоотой гэсэн юм.
Тийнхүү шатахууны үнийн өнгөрөгч жилийн мөн үетэй харьцуулбал даруй 1.61 ам.доллароор өссөн үзүүлэлттэй байгаа ажээ.
АНУ-ын хувьд шатахууны үнийг муж мужаар нь авч үзвэл Сан Франциско хотын Бэй Эриан бүсэд нэг галлон шатахуун 6.20 ам.доллароор буюу улсдаа хамгийн өндөр үнээр худалдаалж байгаа бол Оклахома мужийн Тулса хотод хамгийн хямдаар буюу нэг галлон шатахууныг 3.92 ам.доллароор худалдаалж байгаа юм.
Харин дизель түлшний үнийн хувьд өнгөрөгч хоёр долоо хоногийн хугацаанд нийт 9 центээр нэмэгдэж, нэг галлон нь 5.66 ам.долларын үнэд хүрчээ.
Эх сурвалж: ABC News