Америк улсаас Ираны цөмийн хэлэлцээрийг сэргээхийг зорьж буй Тегераны эсрэг шахалт үзүүлж байна. Энэ хүрээнд Ираны нефтийн бүтээгдэхүүнийг худалдах үйл ажиллагаанд оролцсон хэмээн буруутган хэд хэдэн компанид эдийн засгийн хориг тавилаа. Тус хоригт орсон компаниуд дунд Хятадын таван компани, Энэтхэгийн нэг компани багтжээ.
2015 оны Ираны цөмийн хэлэлцээрийг сэргээх төлөв бүдгэрэхийн хэрээр АНУ-аас Ирантай холбогдуулан олон улсын компаниудын эсрэг авах арга хэмжээ чангарч байна. Иран улс цөмийн хөтөлбөрийг сэргээхдээ АНУ эргэж буцахгүй байх баталгаа шаардсан. Харин АНУ хэлэлцээрээс буцах боломжийг заавал нээлттэй байлгах хэрэгтэй гэж үзэж байгаа юм. Улмаар цөмийн хэлэлцээрийг сэргээх яриа амжилтгүй болох төлөв ажиглагдаж байна.
АНУ ийнхүү Ираны нефть, нефтийн химийн бүтээгдэхүүнд тавьсан хориг арга хэмжээгээ үргэлжлүүлэн хэрэгжүүлэхээр болж байна. Улмаар Хятадын Zhonggu Storage and компанийг Ираны түүхий нефтийг арилжаалах зорилгоор агуулах ажиллуулсан хэргээр, WS Shipping Co компанийг Ираны нефтийн бүтээгдэхүүн тээвэрлэдэг хэмээн буруутган тус тус эдийн засгийн хоригт орууллаа. Мөн АНУ-ын Сангийн яамнаас Хонконгийн Triliance Petrochemical, Энэтхэгийн Tibalaji Petrochem, Арабын Эмират дахь Clara Shipping хэд хэдэн компанийг хоригтоо багтаагаад байна. Мумбайд байрладаг Tibalaji компанийг Иранаас нефтийн бүтээгдэхүүнийг худалдан авч, Хятадад дамлан борлуулсан хэмээн буруутгажээ.
Эх сурвалж: Reuters