Инфляц өсөж, зээлийн хүү нэмэгдсэн нь технологийн компаниудын гуравдугаар улирлын тайланг таагүй үзүүлэлтээр дүүргэжээ. Технологийн тэргүүлэгч компаниудын гуравдугаар улирлын тайлан юу өгүүлэв?
Өмнөд Солонгосын чип үйлдвэрлэгч SK Hynix Inc санах ойн чипний зах зээл урьд өмнө байгаагүйгээр муудаж байна гэв. Тус компанийн гуравдугаар улирлын ашиг 60 хувиар буурсан юм. Улмаар ирэх нэг жилийн хөрөнгө оруулалтаа 50 гаруй хувиар бууруулахаар төлөвлөлөө. Харин хавтгай дэлгэц үйлдвэрлэгч LG Display Co компанийн улирлын алдагдал таамаглаж байснаас өндөр гарсан. Үүнд инфляцын болон зээлийн хүүгийн өсөлт нийт эрэлтийг буруулсан нь нөлөөлжээ. Google дэлхийн хамгийн том дижитал зар сурталчилгааны платформ учир хүнд үед харьцангуй тэсвэртэй гэж тооцож байсан. Гэвч даатгал, үр хөдлөх хөрөнгө, криптовалютын салбарын сурталчилгаа нийлүүлэгчид төсвөө танаснаар сурталчилгааны орлого тооцоолсноос илт бага гарч зах зээлийг цочирдууллаа. Google-ийн толгой компани Alphabet-ийн борлуулалт өнгөрсөн улиралд ердөө зургаан хувиар өссөн нь сүүлийн есөн жилийн доод үзүүлэлт юм. Улмаар Alphabet шинээр зарлагдсан ажлын байраа 50 хувиар танах шийдвэр гаргалаа.
Microsoft сүүлийн таван жилийн хамгийн тааруу борлуулалтын өсөлт харуулав. Тухайлбал, Windows үйлдлийн системийн орлого 15 хувиар буурсан байна. Харин Snap Inc ирэх баярын улиралд ч орлого өсөхгүй гэж таамаглалаа. Өдгөө гурван компани болон хуваагдах явц үргэлжилж буй General Electric компанийн хувьд зарим салбарын ажилчдаа цөөлөх шийдвэр гаргаж байгаа бөгөөд удахгүй танилцуулна. Mattel жилийн ашгийн таамаглалаа бууруулсан бөгөөд ирэх баярын улиралд Барби хүүхэлдэйнхээ урамшууллыг өсгөх төлөвлөгөөтэй байна. iPhone-ийн угсрагч компани Foxconn өргөн хэрэглээний цахилгаан барааны эрэлт сул байгааг онцоллоо. Харин YouTube-ийн зар сурталчилгааны орлого 1.9 хувиар буурч 7 тэрбум ам.доллар болжээ.
Гэвч нөгөө талаас харьцангуй таатай үр дүн харуулсан компани бий. Tesla Inc-ийн ханган нийлүүлэгч LG Energy Solution Ltd батарейны эрэлт өссөн, гадаад валютын ханш тус компанийн хувьд таатай байсны улмаас ашигтай ажиллажээ. Харин Spotify гуравдугаар улиралд 23 сая хэрэглэгч нэмж нэг сарын идэвхтэй хэрэглэгийн тоо нь нийт 456 саяд хүрсэн. Нийт орлого нь 3 тэрбум ам.доллар болж, өмнөх оны мөн үеэс 21 хувиар өсжээ. Мөн автомашин үйлдвэрлэгчдийн гуравдугаар улирлын тайланд өсөлт, бууралт хослон байна.
Гуравдугаар улирлын тайлант мэдээлэл гарсны дараа Alphabet-ийн хувьцааны үнэ долоон хувиар, Microsoft хоёр хувиар, чип үйлдвэрлэгч Texas Instruments таван хувиар, Spotify дөрвөн хувиар, харин Meta-ийн хувьцааны ханш дөрвөн хувиар тус тус буурлаа. Alphabet, Microsoft зэрэг технологийн аварга компаниудын өсөлтийн хурд удааширсан бөгөөд цаашид байдал улам дордохыг анхааруулж байна.
Эх сурвалж: Reuters