АНУ нь Хятадыг хязгаарлах бодлогынхоо хүрээнд Австралийн хамгийн хойд хэсэгт цөмийн хүчин чадал бүхий В-52 стратегийн бөмбөгдөгч онгоц байрлуулахаар шийдсэн гэх мэдээлэл байна.

31-ний өдөр Австралийн олон нийтийн ABC сувгийн онцлон хүргэснээр АНУ-ын Агаарын цэргийн хүчин тус улсын хамгийн хойд хэсэг болох Дарвин дахь Тиндалл агаарын баазад зургаан B-52 бөмбөгдөгч онгоцыг багтаахуйц хүчин чадал бүхий томоохон хэмжээний цэргийн байгууламж барихаар төлөвлөж байгаа талаар мэдээлэв. Энэ тухай 31-ний өдөр ABC сувгийн “Four Corners" эрэн сурвалжлах нэвтрүүлэг хөнджээ.

Уг байгууламжид B-52 бөмбөгдөгч онгоцны буух зурвас, ангар болон засвар үйлчилгээний хэсгийг багтаах аж.

Австралийн хамгийн хойд хэсэгт цөмийн зэвсэг тээвэрлэх хүчин чадал бүхий алсын тусгалт B-52 стратегийн бөмбөгдөгч онгоцыг байрлуулахаар шийдсэн нь Хятадад өгч буй хатуухан сануулга хэмээн шинжээчид тайлбарлажээ.

Тайванийн асуудалтай холбоотойгоор АНУ болон БНХАУ-ын хооронд үүссэн үл ойлголцлын “ачаар” Хойд Австралийн цэрэг, стратегийн үнэ цэн нэмэгдэж, АНУ нь Австрали дахь цэргийн тагнуулын баазуудыг өргөжүүлэхэд анхаарал хандуулахаас аргагүй нөхцөлд хүргээд байгаа юм.

Түүнчлэн АНУ-ын Агаарын цэргийн хүчний нэгэн албан тушаалтан “Four corners” нэвтрүүлэгт ярихдаа “АНУ-ын тал эдгээр бөмбөгдөгч онгоцнуудыг Австралид байрлуулахаар төлөвлөсөн нь агаарын хүчийг өргөжүүлэхэд тун их анхааран ажиллаж буй гэдгийг эсрэг талдаа ойлгуулж буй хэрэг” хэмээн онцлов.

Эх сурвалж: SBS