Даваа гарагт Газпром компанийн Удирдлагын хорооны дарга Алексей Миллер Россия-1 сувгийн “Москва. Кремль. Путин” нэвтрүүлэгт оролцжээ. Нэвтрүүлгийн хүрээнд тэрээр Газпром компанийн ойрын төлөвлөгөөний тухай өгүүлсэн байна.

Түүний хэлснээр, “Унгарын зах зээлд гаргах байгалийн хийн хэмжээг нэмэгдүүлэх талаар авч үзсэн. Энэ онд бид тус улсад нийт 1.3 тэрбум шоо метр байгалийн хийг нэмэлтээр нийлүүлээд байгаа. Үүнээс гадна бид намар-өвлийн улиралд Унгар улсад нийлүүлэх байгалийн хийн хэмжээгээ нэмэгдүүлэх тохиролцоонд хүрсэн” гэжээ.

Ноён Миллерийг тийн мэдэгдэхийн өмнө Унгарын Гадаад хэргийн сайд Петер Сийяртогийн зүгээс ОХУ-аас татаж буй байгалийн хийн импортод сэтгэл хангалуун байгаагаа илэрхийлээд байсан билээ.

Эх сурвалж: ТАСС