ОХУ-ын түрэмгийллийн эсрэг сөрөх довтолгоогоо үргэлжлүүлсээр буй Украинд АНУ-ын зүгээс 400 сая ам.долларын нэмэлт зэвсэг, техникийн тусламж үзүүлэхээр болжээ.
Нью-Йорк Таймс сонины орон нутгийн цагаар 25-ны өдөр мэдээлснээр, Пентагон Украинд тагнуулын нисгэгчгүй нисэх төхөөрөмж, агаарын довтолгооноос хамгаалах пуужин, хуягт машин, мина устгах төхөөрөмж нийлүүлэхээр төлөвлөж байгаагаа мэдэгдсэн талаар онцлов.
Энэ нь АНУ-ын тал Украинд 43 дахь удаагаа аюулгүй байдлын тусламж үзүүлж байгаа хэрэг бөгөөд өнгөрсөн оны хоёрдугаар сард ОХУ халдан түрэмгийлснээс хойш Украинд нийт 43 тэрбум ам.доллароор хэмжигдэх цэргийн тусламжийг үзүүлээд байгаа юм.
Тус улсын Төрийн нарийн бичгийн дарга Энтони Блинкен мэдэгдэхдээ “Хэзээ л бол хэзээ Украины нутгаас цэргээ гаргаж, Украины хотууд болон ард иргэд рүү харгис хэрцгий дайралт хийхээ зогсоох сонголт нь Оросын талд бий. Тэр болтол АНУ болон холбоотон орнууд, түншүүд Украинтай эв санаагаараа нэгдсээр байх болно” хэмээн цохон тэмдэглэсэн байна.
Эх сурвалж: MBC