АНУ-ын хөдөлмөрийн зах зээлийн төлөв байдлын гол хэмжүүр болох ажилгүйдлийн тэтгэмж авахаар хүсэлт гаргагчдын тоо сүүлийн найман сарын хамгийн доод түвшинд хүрсэн байна.
Тодруулбал тус улсын Хөдөлмөрийн яам орон нутгийн цагаар 21-ний өдөр мэдэгдэхдээ, өнгөрсөн долоо хоногт ажилгүйдлийн тэтгэмж авахаар шинээр хүсэлт гаргагчдын тоо 201.000-д хүрсэн нь долоо хоногийн өмнөхтэй харьцуулахад 20.000-аар буурсан үзүүлэлт болохыг онцлов.
Энэ нь өнгөрөгч 1-р сарын дөрөв дэх долоо хоногоос хойш буюу сүүлийн найман сарын хугацаан дахь хамгийн доод үзүүлэлт бөгөөд Wall Street Journal сониноос гаргасан шинжээчдийн таамаглалаас ч доогуур үзүүлэлт аж.
Ийнхүү ажилгүйдлийн тэтгэмж авах хүсэлт гаргагчдын тоо буурсан явдал нь АНУ-ын эдийн засаг өссөөр байгааг илэрхийлэх нэгэн том үзүүлэлт юм.
Санхүү, технологийн салбарын аж ахуй нэгж, компаниуд нэлээд өргөн хүрээтэй цомхотголыг ээлж дараалан хийснээр ажилгүйдлийн тэтгэмж горилогчдын тоо энэ он гарсаар тасралтгүй нэмэгдэж байсан ч өнгөрөгч 7-р сараас хойш буурах хандлага ажиглагдаж эхэлсэн байна.
Эх сурвалж: MBC, SBS