Хиймэл оюун ухааны салбарт хувьсгал хийсэн ChatGPT системийг хөгжүүлэгч OpenAI компанийн үнэлгээг 90 тэрбум ам.долларт хүрсэн гэх тооцоо байгаа бөгөөд одоо байгаа хувьцаагаа зарахаар хөрөнгө оруулагчидтай хэлэлцээр хийж буй талаар Wall Street Journal сонин эх сурвалжаас иш татан мэдээлэв.

Тодруулбал OpenAI компанийн үнэлгээ 80-90 тэрбум ам.долларт хүрсэн гэх тооцоо байгаа бөгөөд хэдэн зуун сая ам.доллароор үнэлэгдэх хувьцаагаа Цахиурын хөндийн хөрөнгө оруулагчдад зарахаар төлөвлөж байгаа аж.

Тус компани нь өнгөрөгч 1-р сард 30 тэрбум ам.долларын үнэлгээг хүлээн зөвшөөрч, Microsoft компанид олон тэрбум ам.доллароор үнэлэгдэх хувьцаагаа зарсан билээ. Тиймээс ч энэ удаагийн хэлэлцээр амжилттай болсон тохиолдолд хэдхэн сарын дотор тус компанийн үнэлгээ бараг гурав дахин өссөн гэсэн үг болох юм.

Одоогийн байдлаар нийт хувьцааны 49 хувийг эзэмшиж буй Microsoft компани энэ удаагийн борлуулалт санасны дагуу хэрэгжвэл маш их хэмжээний үнэлгээний ашиг хүртэх боломж бүрдэх билээ.

Нэмж дурдахад тус компани нь энэхүү хэлэлцээрийн явцад хөрөнгө босгох зорилгоор шинэ хувьцаа гаргахын оронд одоо байгаа хувьцаагаа зарах боломжийг ажилчдадаа олгохоо мөн мэдэгдсэн юм.

OpenAI-ийн удирдлага хөрөнгө оруулагчидтай хийсэн хэлэлцээрийн үеэр энэ жил 1 тэрбум ам.долларын борлуулалт хийх бол ирэх жил борлуулалт нь хэдэн тэрбум ам.доллароор хэмжигдэх болно хэмээн амласан байна.

Тэрчлэн тус компанийн зүгээс ямар нэгэн компани дийлэнх хувьцааг нь эзэмшихийн эсрэг байр суурьтай байдаг тул энэ удаад Microsoft-д нэмэлтээр хувьцаагаа борлуулахгүй байх төлөвтэй байгаа юм.

Эх сурвалж: YTN