АНУ-ын засгийн газар Гадны орнуудад зэвсэг техник борлуулах зохицуулалтын хүрээнд “Tomahawk” далавчит пуужингуудыг Япон улсад худалдах шийдвэр гаргажээ.
АНУ-ын Батлан хамгаалах яамны Батлан хамгаалахын аюулгүй байдлын хамтын ажиллагааны агентлаг орон нутгийн цагаар 17-ны өдөр мэдэгдэхдээ, Японы засгийн газраас хүссэн 2 тэрбум 350 сая ам.доллароор хэмжигдэх "Tomahawk” далавчит пуужингийн системийг борлуулах зөвшөөрлийг Төрийн департамент олгосон хэмээн дурдсан байна.
Тодруулбал Японы засгийн газар “Tomahawk Block 4” болон хамгийн сүүлийн үеийн загвар болох “Block 5” загвараас тус бүр 200, 200 хүртэлх тоогоор худалдаж авах хүсэлт гаргасан аж.
Ойролцоогоор 1600 километрийн тусгалтай уг систем нь дайсны довтолгооны үед пуужин хөөргөх цэгүүдэд цохилт өгөх зэрэг сөрөг довтолгооны гол “зэвсэг” болно хэмээн Японы тал харж байгаа гэв.
АНУ-ын Батлан хамгаалахын сайд Ллойд Остин өнгөрсөн сард Вашингтонд болсон АНУ-Японы Батлан хамгаалахын сайд нарын уулзалтын үеэр Японы батлан хамгаалах чадавхийг бэхжүүлэх, батлан хамгаалахын зардлыг нэмэгдүүлэхэд дэмжлэг үзүүлэхээ дахин илэрхийлж байсан билээ. Түүнчлэн Япон улсын 400 “Tomahawk” худалдаж авах хугацааг 2025 оны санхүүгийн жил болгон нэг жилээр урагшлуулахаар тохиролцсон аж.
Эх сурвалж: MBC