Хонконгийн засаг захиргааны тэргүүн Жон Ли үндэсний аюулгүй байдалд заналхийлж болзошгүй үйлдлүүдийг таслан зогсоох зорилготой тус нутаг дэвсгэрийн аюулгүй байдлын тухай хуулийн үндсэн заалтуудыг танилцууллаа.

Шинэ хууль бол Хятадын засгийн газраас 2020 онд баталсан Хонконгийн үндэсний аюулгүй байдлын тухай хуульд оруулж буй нэмэлт өөрчлөлт юм.

Ли мягмар гарагт сэтгүүлчдэд мэдэгдэхдээ, урьдчилан тааварлахын аргагүй гэнэтийн байдлаар үндэсний аюулгүй байдалд аюул занал учирдаг бөгөөд шинэ хуулийг яаралтай баталснаар ийм аюул заналыг багасгах боломжтой, ийм хууль гаргах зайлшгүй шаардлагатай гэдгийг онцолжээ.

Шинэ хуулиар төрийн нууцыг хулгайлах, тагнуул хийх, гадны хүчнүүд Хонконгийн хэрэгт хөндлөнгөөс оролцох, компьютер ашиглан үндэсний аюулгүй байдлын эсрэг хорлон сүйтгэх үйл ажиллагааг явуулахыг таслан зогсооно гэж тэрбээр тайлбарлав.

Хонконгийн засаг захиргаа хоёрдугаар сарын 28-ны өдрийг хүртэлх хугацаанд иргэд, гадаадын бизнес эрхлэгчид, консулын газруудад шинэ хууль батлах болсон үндэслэлийг тайлбарлаж, тэдний санал бодлыг нь сонсохоор төлөвлөжээ.

Эх сурвалж: NHK /МОНЦАМЭ агентлаг/