Туркийн “Roketsan” компани хиймэл оюун ухааны технологи ашигласан “ALKA” лазерын зэвсгийг бүтээж дуусгасан тухай тус компанийн дэвшилтэт системийн менежер Сейит Тунч мэдэгдэв.
Зэвсгийн эл системийг Туркийн Ерөнхийлөгчийн засаг захиргааны дэргэдэх батлан хамгаалах аж үйлдвэрийн газрын удирдлага дор бүтээжээ. С.Тунчийн хэлснээр, "ALKA" нь цахилгаан соронзон ба лазер технологиудыг хослуулсан агаарын довтолгооноос хамгаалах цогцолбор юм.
Дэлхий дахинд болж буй сүүлийн үеийн үйл явдлууд, ялангуяа Украин дахь дайнтай холбоотойгоор одоо байгаа зэвсгийг шинэчлэн сайжруулах, тэр дундаа хиймэл оюун ухаан ашиглан сайжруулах хэрэгцээ шаардлага үүсээд байна хэмээн С.Тунч “ALKA”-г танилцуулах үеэрээ онцлон тэмдэглэлээ. Түүний хэлснээр, "тэгш бус аюул заналыг" сөрөн эсэргүүцэхэд Турк улсад ийм зэвсэг шаардлагатай байгаа ажээ.
Дээрх системийг анх 2019 онд Истанбулд "IDEF" батлан хамгаалах аж үйлдвэрийн үзэсгэлэнгийн үеэр танилцуулсан юм. “Roketsan”-ы цахим хуудсанд бичсэнээр, уг цогцолборын лазерын тусгал нь 750 м бөгөөд дроныг устгах, мөн мина болон гар хийцийн тэсрэх төхөөргийг зайнаас дэлбэлэх зориулалттай ажээ.
Эх сурвалж: TRT Haber /МОНЦАМЭ агентлаг/