Хагас дамжуулагч үйлдвэрлэгч NVIDIA компани Индонезэд хиймэл оюун ухааны төв байгуулахад 200 сая ам.долларын хөрөнгө оруулалт хийхээр болжээ.

Орон нутгийн цагаар 5-ны өдөр CNN Индонези суваг тус улсын Харилцаа холбооны сайд Буди Ари Сетиади мэдэгдлээс иш татан мэдээлснээр, NVIDIA болон Индонезын харилцаа холбооны Indosat компани 200 сая ам.долларын хөрөнгө оруулалт бүхий хиймэл оюун ухааны төвийг Төв Ява мужийн Суракарта хотод энэ ондоо багтаан барихаар болсныг онцлов.

Харилцаа холбооны сайд Сетиади хэлэхдээ, "Уг төвийг Суракарта хотод орших Техно Паркт барих ба хүний ​​нөөцийг хөгжүүлэх болон харилцаа холбооны дэд бүтцийг хөгжүүлэх чиглэлээр тус тус ашиглах болно. Байршлыг сонгохдоо хүний ​​нөөц сайтай байдал болон гар утасны 5G дэд бүтэц нэвтэрсэн зэргийг харгалзан үзсэн” хэмээн цохон тэмдэглэсэн байна.

Суракарта хот бол Индонезын ерөнхийлөгч Жоко Видодогийн төрөлх хот юм. Ерөнхийлөгч Жоко Видодо 2010 онд Суракарта хотын захирагчаар сонгогдсоноор улс төрд хөл тавьж байсан билээ.

Нэмж дурдахад, Суракарта хотын одоогийн захирагч нь ерөнхийлөгч Жоко Видодогийн ууган хүү Гибран Ракабуминг Раха бөгөөд өнгөрөгч хоёрдугаар сард болсон ерөнхийлөгчийн сонгуулиар дэд ерөнхийлөгчөөр мөн сонгогдсон юм.

Тэрээр NVIDIA компани Суракарта хотод томоохон хөрөнгө оруулалт хийх гэж буй талаарх уг мэдээтэй холбоотойгоор “Бид хиймэл оюун ухааны технологийг нэн даруй хэрэглээнд нэвтрүүлэх шаардлага тулгарч буй нь үнэн. Хэзээ нэгэн цагт бүх зүйл хиймэл оюун ухааны технологид суурилан хөгжих нь тодорхой болсон энэ цаг үед бид үүний ард хоцорч хэрхэвч болохгүй” хэмээн үзэл бодлоо илэрхийлжээ.

Эх сурвалж: Maeil