Европын хөл бөмбөгийн аварга шалгаруулах тэмцээний хэсгийн шатны гуравдугаар тойргийн тоглолтод Данийн шигшээ баг Сербийн багтай 0:0-ээр тэнцсэнээр хасагдах шатанд шалгарлаа.

Мюнхен хотод болсон тоглолтод “Их дуулга”-ын 24 удаагийн аварга Новак Жокович Сербийн шигшээ багаа дэмжихээр иржээ.

С хэсгийн өөр нэг тоглолтод Англи, Словенийн багууд мөн 0:0-ээр тэнцсэн байна. Ингэснээр Словенийн шигшээ баг анх удаагаа Европын аварга шалгаруулах тэмцээний хасагдах шатанд шалгарав. С хэсгийн тоглолтууд дууссаны дараа В хэсгийн гуравдугаар байрт шалгарсан Хорватын шигшээ баг 1/8 шигшээд үлдэх боломжоо алдсан нь тодорхой боллоо.

Данийн шигшээ баг нэмэлт үзүүлэлтээр С хэсэгт хоёрдугаар байр эзэлсэн бөгөөд 1/8 шигшээд Германы шигшээ багтай зургаадугаар сарын 29-нд Дортмунд хотод учраа тааран тоглоно. Хэсгийн эхний байрт Английн баг (5), гуравдугаар байрт шалгарсан Словенийн баг (3) шалгарчээ.

Эх сурвалж: МОНЦАМЭ