БНСУ-ын Гүми хотын консулд “ажилд орсон” робот туслах ажлын байран дээрээ шатнаас унаж, бүрмөсөн эвдэрсэн тухай хотын удирдлага мэдээлжээ.
Гэрчийн мэдүүлснээр робот туслах шатаар унахынхаа өмнө ямар нэг юм нь эвдэрсэн мэт нэг газраа эргэлдэж байсан гэнэ.
Болсон явдлын шалтгааныг тодруулахаар мэргэжилтнүүд роботын тарж бутарсан хэсгүүдийг цуглуулан авч шинжилж байгаа аж.
Тус роботыг Калифорнид төвтэй Бийр роботикс компани бүтээж, өнгөрсөн оны наймдугаар сард тус хотын консулд хүлээлгэн өгчээ. Тэр цагаас хойш робот өөрийн гэсэн ажилтны үнэмлэхтэй болж, ажлын өдөр өглөө есөөс орой арван зургаан цаг хүртэл оффис дотор бичиг баримт зөөх, үйлчлүүлэгчдэд туслах, хотыг сурталчлах зэрэг чухал үүрэг гүйцэтгэж байсан гэнэ.
Чухал ажилтнаа харамсалтайгаар алдсан хамт олон нь “Робот манай хотын чухал хэсэг, бидний хамтрагч байлаа. Үнэхээр хичээнгүй ажилтан байсан юм” хэмээн ярьжээ.
Тус үйл явдлын тухай нутгийн хэвлэл мэдээллийн хэрэгслүүд БНСУ-ын хувьд робот “амиа хорлосон” анхны тохиолдол хэмээн мэдээлж эхэлжээ. Үүнээс өмнө Вашингтон хотод Стив нэртэй хамгаалалтын робот усан оргилуурт живж эвдэрч байсан юм.
Стивтэй салах ёс гүйцэтгэж буй дүрс бичлэг тухайн үед цахим орчинд олны анхаарлыг татаж, хиймэл амь хэр үнэ цэнтэй тухай сэдэв хүмүүсийн хошин ярианы сэдэв болоод амжсан билээ. Гэвч Стивийн хар хайрцгийг үзэхэд хөдөлгөөнтэй замын хавтан дээр халтирч усанд унасан нь хожим тодорхой болсон юм.
Эх сурвалж: RT