Балбын шүүхээс мянга мянган дагагч сүсэгтэн олондоо “Буддагийн хойд дүр” хэмээн хүндлэгдсэн 33 настай Рам Бахадур Бамжоныг бага насны хүүхдэд бэлгийн хүчирхийлэл үйлдсэн хэрэгт буруутган 10 жил хорих ял оноолоо.
Рам Бахадур Бамжон өсвөр насандаа буюу 2005 онд Балбын зүүн өмнөд нутгийн шигүү ойн нэгэн том модны доор завилан сууж 10 сарын турш бясалгасан нь олны анхаарлыг татаж, түүнийг “Буддагийн хойд дүр” хэмээн нэрлэх шалтгаан болсон юм.
Шүүхийн ажилтан Сикиндэр Каапарын мэдээлснээр Бамжон хоригдохоос гадна хохирогчид 3750 ам.долларын хохирол барагдуулах ёстой гэж шүүгч шийдсэн байна.
Дагагчид нь Бамжоныг 15 насандаа 10 сар бясалгахдаа хоол идээгүй, ус уугаагүй, унтаагүй гэлцдэг ч энэ талаар албан ёсны баталгаа байдаггүй билээ.
Эх сурвалж: CNN