Испани улсын харьяа Ла Пальма арал дахь галт уул дэлбэрээд өдгөө нэг сарын нүүрийг үзэж байгаа билээ. Гэвч галт уулын дэлбэрэлт одоо ч өндөрлөх шинжгүй байна.
Өнөөг хүртэл нийт 1800 барилга, байгууламжийг сүйтгэсэн дэлбэрэлт анх есдүгээр сарын 19-ний өдөр эхэлсэн бөгөөд галт уулын нөхцөлийг судлах шинжээчдийн хэлж байгаагаар, дэлбэрэлт болж дуусах шинж огт үгүй байгаа гэнэ. Мөн Канарын арлуудын ерөнхийлөгч Энгель Виктор Торресийн хэлснээр, “Бид одоо галт уулын ивээлийг л харж байна. Дэлбэрэлт хэзээ өндөрлөхийг шийдэх ганц эрх мэдэлтэн бол галт уул” хэмээжээ.
Галт уулын дэлбэрэлтийн улмаас 7000 хүнийг нүүлгэн шилжүүлсэн бол галт уулын хайлмаг 754 гектар газрыг хамарч, эх газраас хальж, далай руу урсаж байгаа тухайд бид цаг алдалгүй мэдээлж байгаа юм.
Эх сурвалж: AP News