Ройтерс агентлагт дөрвөн эх сурвалжийн мэдээлснээр ОХУ-ын агаарын тээврийн компаниуд барууныхны тавьсан хоригоос үүдэн тийрэлтэт онгоцнуудаа задалж, эд анги сэлбэж байгаа гэжээ.

ОХУ-ын засгийн газрын зүгээс өнгөрөгч зургаадугаар сард агаарын тээврийн компаниуддаа нэгэн зөвлөмж хүргүүлсэн нь дор хаяж 2025 оныг хүртэл агаарын тээврийн үйлчилгээгээ үргэлжлүүлэхийн тулд зарим нэг онгоцыг задалж, гадаад онгоцнуудын эд ангийг сэлбэх хэрэгтэй гэсэн юм. Улмаар эх сурвалжуудын өгсөн мэдээлэл Оросын засгийн газраас хүргүүлсэн зөвлөмжтэй таарч байгаа ажээ.

Нэгэн эх сурвалжийн хэлснээр одоогийн байдлаар ОХУ-ын үндэсний агаарын тээвэрлэгч Аэрофлотын Сухой Супержет 100, Эйрбус А350 онгоцнууд задаргаанд орж байгаа гэсэн юм. Түүний мэдээлснээр задаргаанд орж буй Эйрбус А350 онгоц нь бараг шинээрээ байсан гэжээ.

Үйл явдлын хүрээнд Ройтерс агентлагийн зүгээс ОХУ-ын Тээврийн яам болон Аэрофлот компаниас тайлбар авахыг хүссэн ч тэд татгалзсан байна.

Эх сурвалж: The Reuters