Google компани нь хайлтын системийн салбарын илт давуу байдлаа хадгалж үлдэхийн тулд андройд платформыг зүй бусаар ашигласан хэмээн буруутгагдаж 4.1 тэрбум еврогоор торгуулахаар боллоо.

Давж заалдах шатны шүүхээс өнөөдөр гаргасан тус шийдвэр нь Европын комиссоос оногдуулж буй монополын эсрэг хамгийн өндөр дүнтэй торгууль юм. Өмнө нь анхан шатны шүүхээс 4.3 тэрбум еврогийн торгууль тогтоосон байсан. Google шүүхийн шийдвэрт сэтгэл дундуур байна.

Европын Холбоо 2018 онд Google-ийг монополын эсрэг хууль зөрчсөн гэж буруутган шүүхэд мэдүүлсэн. Тодруулбал, андройд системийн гар утас үйлдвэрлэгчид бүтээгдэхүүндээ Play Store-ийг суулгахын тулд Google-ийн бусад аппликейшныг мөн адил урьдчилан суулгасан байх шаардлагатай тулгарч байсан. Тус шаардлага салбарын бусад өрсөлдөгчийн боломжийг хаасан хэрэг гэж Европын Холбоо үзсэн юм. Google тухайн үед гар утас үйлдвэрлэгчдэд тулгадаг энэхүү нөхцөлөө даруй өөрчилсөн билээ.

Google андройд үйлдлийн систем хөгжүүлэгч компанийг 2005 онд 50 сая ам.доллароор худалдан авч нэгтгэсэн бөгөөд өнөөдөр дэлхийн нийт гар утасны 70 хувь нь андройд системтэй байна.

Эх сурвалж: BBC