Японы Toyota Motor Corp компани Мьянмарт автомашин угсрах шинэ үйлдвэр байгуулсан боловч ковидын цар тахал болон улс төрийн үймээний улмаас 19 сарын турш ямар нэг үйл ажиллагаа явуулахгүй, бүрэн зогсоосон байсан юм. Харин одоо нэг хоногт нэгээс хоёр ширхэг Hilux том оврын автомашин угсарч эхэллээ.

Ихэнх засгийн газар Япон болон бусад орны компаниудыг Мьянмарт хөрөнгө оруулахыг дэмжихгүй байгаа. Учир нь цэргийн дэглэмийг санхүүжүүлж байна хэмээн тооцох боломжтой юм. Улмаар тэндхийн гадаадын хөрөнгө оруулалттай ихэнх компани хаалгаа барьж буй боловч Toyota ганцаар “урсгал сөрж” байна. Энэ тухайд Toyota “Бид анхнаасаа Мьянмарын аж үйлдвэрлэлийн зах зээлийг хөгжүүлэхэд хувь нэмэр оруулахыг зорьсон. Тус улс дахь манай ажилтан, албан хаагчид, тэдний гэр бүлийн амьдралд бид дэмжлэг үзүүлж байна. Компанийн зүгээс бүх хууль, тогтоомжид нийцүүлэн ажиллана” хэмээн мэдэгдэл хийсэн юм. Үйлдвэр 2021 оны хоёрдугаар сард үйл ажиллагаагаа эхлүүлэхэд бэлэн болсон байсан боловч тухайн сард Мьянмар цэргийн дэглэмд шилжсэн билээ.

Эх сурвалж: Reuters