Барууны орнууд Оросын газрын тосны үнийг баррель тутамд 60 ам.доллароор хязгаарлахаар тохиролцсоны хариуд тус улс олборлолтоо бууруулахын сацуу үнийн дээд хязгаарыг хэрэгжүүлсэн орнуудад газрын тос худалдаалахгүй гэсэн байр суурьтай байгаагаа мэдэгдлээ.

ОХУ-ын шадар сайд Александр Новак орон нутгийн цагаар 5-ны өдөр ТАСС агентлагт хэлэхдээ, үнийн дээд хязгаар нь чөлөөт худалдааны зарчмыг зөрчсөн хөндлөнгийн үйлдэл бөгөөд нийлүүлэлтийн хомсдол үүсгэж, дэлхийн эрчим хүчний зах зээлийг тогтворгүй болгох болно хэмээн цохон тэмдэглэжээ.

Шадар сайд Новак “Бид олборлолтоо бууруулсан ч зөвхөн бидэнтэй хамтран ажиллах орнуудад газрын тос болон түүнтэй холбоотой бүтээгдэхүүнээ борлуулна. Түүнчлэн үнийн дээд хязгаар хэд байхаас үл хамааран үнийн дээд хязгаарыг огт хэрэглэхгүй байх зах зээлийн механизмын судалгааг хийж байна” хэмээн тайлбарлав.

Үүнтэй холбогдуулан Ройтерс агентлаг орон нутгийн эх сурвалжаас иш татан мэдээлснээр, ОХУ-ын зүгээс газрын тос болон газрын тосны бүтээгдэхүүний үнийн дээд хязгаарт оролцож буй улс орнууд, бизнесийн байгууллагуудтай ямарваа нэгэн гүйлгээ хийхийг хориглох тухай хууль боловсруулахаар төлөвлөж буйг онцлон тэмдэглэсэн байна.

Европын холбоо өнгөрөгч 2-ны өдөр ОХУ-ын дайны санхүүжилтэд хүндрэл учруулах зорилгоор тус улсын газрын тосны үнийг баррель тутамд 60 ам.доллар байхаар дээд хязгаар тогтоох тохиролцоонд хүрсэн билээ.

Энэ нь ОХУ-ын Уралын түүхий газрын тос одоогоор нэг баррель нь 70 ам.доллароор зарагдаж байгаагаас 10 орчим ам.доллароор бага байгаа юм. АНУ, Япон, Их Британи тэргүүтэй “Их 7”-гийн бүлэг болон Австрали улс ч Европын холбооны зүгээс санал болгосон Оросын газрын тосонд үнийн дээд хязгаар тогтоох энэхүү шийдвэрт нэгдэхээ мэдэгдээд байгаа билээ.

Ингэснээр “Их 7”-гийн бүлэг, Европын холбооны гишүүн орнууд болон Австрали улс дээр дурдсан үнийн дүнгээс дээш үнээр экспортолж буй Оросын газрын тосны бүтээгдэхүүнд даатгал, тээвэр зэрэг далайн тээврийн үйлчилгээг үзүүлэхгүй аж.

Эх сурвалж: Yonhap