Мягмар гарагт БНХАУ-ын Үндэсний Статистикийн хорооноос тус улсын 2023 оны эхний улирлын эдийн засгийн тайланг танилцуулжээ.
Тайлангаас үзвэл Хятадын ДНБ өнгөрөгч гурван сарын хугацаанд 4.5 хувиар өссөн байна. БНХАУ-ын эдийн засгийн хувьд хамгийн сүүлд өнгөрөгч оны мөн үед ийн эрчимтэй буюу 4.8 хувиар өсөж байсан юм. Улмаар 2023 оны эхний улирлын эдийн засгийн өсөлт Ройтерс агентлагаас дэвшүүлээд байсан таамаглалыг 0.5 хувиар давжээ.
Тийнхүү тайлан гарсны дараагаар Нан Фунг хөрөнгө оруулалтын компанийн гүйцэтгэх захирал Хелен Жугийн хэлснээр тус улсын эдийн засгийн өсөлт энэ оны хоёрдугаар улиралд 5 хувийг давна гэсэн юм.
БНХАУ-ын засгийн газрын зүгээс энэ онд эдийн засгийн өсөлтөө 5 хувьд хүргэхээр зорьсон бөгөөд эдийн засагч нарын хэлж байгаагаар тус улсын эдийн засаг энэ хэвээр өссөөр байвал зорилтот хувиа ч давж магадгүй гэжээ.
Эх сурвалж: CNBC