Японы Хөдөө аж ахуй, ой, загас агнуурын сайд Тэцуро Номура 2011 онд Фукушима Дайчи атомын цахилгаан станцын ослоос хойш Европын холбооны зүгээс авч хэрэгжүүлж буй Япон хүнсний импортод тавьсан хязгаарлалтыг цуцлахыг тус холбооноос хүссэн байна.
Тодруулбал Хөдөө аж ахуй, ой, загас агнуурын сайд Номура өчигдөр Японд айлчилсан Европын холбооны Хөдөө аж ахуйн асуудал эрхэлсэн комиссар Жануси Войцеховскийтэй уулзах үеэрээ энэхүү асуудлыг хөнджээ.
Уг журмыг хүчингүй болгосноор Фүкүшима муж зэрэг 10 бүс нутгаас хүнс импортлоход шаарддаг цацраг идэвхт бодисын хяналтын гэрчилгээг авах шаардлагагүй болох аж.
Өнгөрсөн сарын 29-ний өдөр Европын холбоо уг журмыг цуцлах эсэх асуудлыг Комисс болон 27 гишүүн орноос бүрдсэн хороогоор хэлэлцсэн ч үр дүн хараахан хүрч чадаагүй юм.
Японы ерөнхий сайд Фумио Кишида, Европын комиссын дарга Урсула фон дер Ляйен нар энэ сарын 13-ны өдөр Бельгийн нийслэл Брюссель хотноо зохион байгуулагдах Япон-Европын холбооны дээд хэмжээний уулзалтын хэлэлцэх асуудлын жагсаалтад энэ асуудлыг хэлэлцэхээр оруулсан байгаа аж.
Эх сурвалж: MBC