Саяхан сарны өмнөд туйлд газардаж, хайгуулын үйл ажиллагаагаа үргэлжлүүлж байгаа Энэтхэгийн “Чандраяан 3" станцын хайгуулын робот болох “Прагян” нь сарны гадаргуу дээр хүхэр байгааг илрүүлжээ.

Тэрчлэн эрдэмтдийн таамаглаж байсанчлан хүчилтөрөгч, хөнгөн цагаан, кальци, төмөр, хром, титан, манган, цахиур зэрэг элементүүд ч мөн илэрсэн байна.

Hindustan Times зэрэг Энэтхэгийн хэвлэл мэдээллийн хэрэгслүүдийн орон нутгийн цагаар 30-ны өдөр мэдээлснээр, Энэтхэгийн Үндэсний сансар судлалын агентлаг өмнөх өдөр нь олон нийтийн сүлжээгээр дамжуулан “Прагян” хайгуулын робот дээр суурилуулсан "лазер удирдлага бүхий спектрометр"-ийн тусламжтайгаар энэхүү нээлтийг хийж чадсан хэмээн мэдэгджээ.

Түүнчлэн устөрөгч байгаа эсэхийг илрүүлэх хайгуулын ажил хийгдсээр байгаа хэмээн Энэтхэгийн Үндэсний сансар судлалын агентлаг цохон тэмдэглэсэн байна.

Тус агентлаг нь өнгөрөгч 28-ны өдөр олон нийтийн сүлжээгээр дамжуулан олон нийтэд мэдээлэл хүргэхдээ баруун тийш өсөж буй графикийн хамтаар “Чандраяан 3” станцын гадаргуугийн термофизикийн туршилтын төхөөрөмж анхны ажиглалтын үр дүнгээ илгээлээ хэмээн мэдэгдэж байв.

Эх сурвалж: MBC