АНУ-ын Хөдөлмөр эрхлэлтийн тэгш байдлын комисс өнгөрөгч долоо хоногийн лхагва гарагт Уолмарт сүлжээ дэлгүүрийн эсрэг дахин гомдол гаргажээ. Үүний шалтгаан нь тэд Уолмарт сүлжээ дэлгүүрийг АНУ-ын Хөгжлийн бэрхшээлтэй иргэдийн тухай хуулийг зөрчсөн гэж үзсэнтэй холбоотой юм.
Тодруулбал, Уолмарт компани 2015 онд “Pathways Training Program” гэх сургалтын хөтөлбөрийг гуравдагч этгээдийн оролцоотойгоор боловсруулсан бөгөөд уг хөтөлбөрийн хүрээнд тэд “Pathways Graduation Assessment” гэх шалгалтыг ажил горилогчдоос авдаг болсон билээ. Гэвч АНУ-ын Хөдөлмөр эрхлэлтийн тэгш байдлын комиссоос хэлж байгаагаар тэдний эл шалгалт хөгжлийн бэрхшээлтэй хүмүүсийн ажил үүргийн хуваарьтай огтоос холбоогүй атал тэд албаар шалгалт авч, тэднийг ажлын ярилцлагад унагаж байна гэсэн юм.
Тийнхүү АНУ-ын Хөдөлмөр эрхлэлтийн тэгш байдлын комисс долоо хоногийн дотор Уолмарт сүлжээ дэлгүүрийн эсрэг хоёр ч гомдол гаргаад байгаа ажээ. HR Dive хуудаснаас мэдээлснээр тэд өнгөрөгч долоо хоногт Уолмарт компанийн эсрэг гомдол гаргасан нь сонсголын бэрхшээлтэй ажилтнуудаа хэлмэрчээр хангахаас татгалзсан гэсэн юм.
Эх сурвалж: HR Dive