Пүрэв гарагт арлын Япон улс Фүкүшимагийн Дайичи АЦС-ын цацраг идэвхт бодисоор бохирдож, цэвэршүүлсэн хаягдал усны хоёр дахь ээлжийн усыг далайд цутгаж эхэлжээ. Энэ тухай мэдээллийг Дайичи АЦС-ын оператораас мэдээлсэн байна.
Үйл явдлын хүрээнд Токиогийн Цахилгаан Эрчим хүчний Компаниас мэдэгдсэнээр тэд нийт 3 долоо хоног хүрэхгүй хугацаанд өдөрт 460 тонн цэвэршүүлсэн усыг далайн эргээс 1 километр зайд байх усан доогуурх хоолойгоор далайд цутгахаар төлөвлөсөн гэсэн юм.
Япон улсын зүгээс Фүкүшимагийн АЦС-ын цэвэршүүлсэн хаягдал усыг нийт 4 ээлжид хуваан далайд цутгах болсон билээ. Улмаар хаягдал усыг далайд цутгах ажил ирэх оны гуравдугаар сарыг дуустал үргэлжлэх юм.
Албаныхны мэдээлж байгаагаар цацраг идэвхт бодисоор бохирдсон усыг цэвэршүүлэн далайд цутгасан хойно далайн ус болон загасыг шинжлэхэд хэвийн хэмжээг давсан хэмжээний тритиум болон бусад цацраг идэвхт бодисууд илрээгүй гэнэ. Гэсэн хэдий ч Хятад, Орос тэргүүтэй цөөн улс Япон улсын эл шийдвэрийг шүүмжилж, төлөвлөгөөгөө зогсоохыг шаардаж байгаа билээ.
Эх сурвалж: Nikkei Asia