Дуу хөгжим, подкаст стрийминг үйлчилгээ үзүүлэгч Spotify компани ажиллах хүчээ 17 хувиар бууруулах болсноо мэдэгджээ. Улмаар орон тооны цомхотголд 1,500 ажилтан багтах төлөвтэй байгаа юм. Үүний шалтгаан нь тэд компанийнхаа зардлыг бууруулахаар оролдож буйтай холбоотой ажээ.
Spotify компанийн хувьд нийт 9,000 орчим ажилтантай ч орон тооны цомхотгол хийсний дараагаар тэдний нийт ажилтны тоо 7,500 орчим болох гэнэ. Тэдний зүгээс оны эхэнд мөн орон тооны цомхотгол хийсэн ч энэ удаагийн шийдвэрт дүйх хэмжээний олон тооны ажилтныг цомхотголд оруулаагүй юм.
Шийдвэрийг танилцуулахтай зэрэгцэн тус компанийн гүйцэтгэх захирал Даниель Экийн мэдэгдсэнээр Spotify компани ирэх 2024, 2025 онуудад ч мөн орон тооны цомхотгол хийнэ гэсэн байна. Гэхдээ тэдний тооцож байгаагаар төлөвлөгөөт орон тооны цомхотголууд энэ удаагийнх шиг өргөн цар хүрээтэй байхгүй гэжээ.
Эх сурвалж: BBC