Пакистаны шүүх Ерөнхий сайд асан Имран Хан-д төрийн нууц задруулсан хэргээр 10 жилийн хорих ял оноолоо.

И.Хан 2018-2022 онд Ерөнхий сайдын албыг хашиж байсан бөгөөд өнгөрсөн наймдугаар сард түүнийг авлигын хэргээр буруутгаж баривчилсан байна. Дараа нь албаны нууцыг задруулсан хэрэгт буруутгажээ.

Пакистаны хэвлэлүүдэд мэдээлснээр, шүүхийн шийдвэр мягмар гарагт гарсан бөгөөд И.Ханы ойрын туслах, Гадаад хэргийн сайд асан Шах Мехмуд Курешид мөн 10 жилийн хорих ял оноосон байна. Шүүхийн шийдвэрийн талаар дэлгэрэнгүй мэдээлэл одоогоор алга байна. Гэхдээ И.Ханы өмгөөлөгчид давж заалдах гэж байгаа бололтой.

Шүүхийн шийдвэр ирэх хоёрдугаар сарын 8-ны өдөр товлогдсон бүх нийтийн сонгуулийн өмнө гарч байна. И.Хан крикетийн од тамирчин байсан бөгөөд түүний “Шударга ёсны төлөөх хөдөлгөөн” нам залуучуудын дунд нэлээд нэр хүндтэй.

И.Хан-д хорих ял оноосон нь ирэх таван жилд сонгуульд нэр дэвшихэд нь түүнд болон түүний туслахад ихээхэн хүндрэл учруулна гэж Пакистаны хэвлэлүүдэд бичиж байна. Харин И.Ханы дэмжигчдийн хувьд, шүүхийн шийдвэрийг сонгуулийн кампанит ажилд саад учруулах гэсэн оролдлого хэмээн эсэргүүцжээ.

Эх сурвалж: BBC /МОНЦАМЭ агентлаг/