Google компани бодитоор хэрэглэх программуудад зориулсан квантын алгоритм зохиох 5 сая ам.долларын шагналын сантай уралдаан зарлалаа.

“XPRIZE Quantum Applications” хэмээн нэрлэсэн уралдаан гурван жил үргэлжилнэ. Хэдийгээр квант компьютер нь зарим тооцооллыг энгийн компьютероос хамаагүй хурдан гүйцэтгэдэг нь батлагдсан боловч алгоритмуудын дийлэнх нь практикт хэрэглэгдэггүй. Google квантын тооцооллын практик хэрэглээний хөгжлийг хурдасгахын тулд XPRIZE компанитай нэгджээ.

Квант компьютеруудыг ашиглан нийгмийн чухал асуудлуудыг шийдвэрлэх асар их боломж бий. Google болон бусад компаниудын судалгаагаар квант компьютеруудыг жишээлбэл, шинэ эм гарган авах, илүү бат бөх, удаан эдэлгээтэй шинэ материал бий болгох, шинэ үеийн батарей, халуун цөмийн реактор бүтээхэд ашиглах боломжтой болохыг харуулсан юм. Гэсэн хэдий ч энэ технологийг хүн төрөлхтөн бүрэн дүүрэн ашиглаж чадаагүй хэвээр байна. Квантын технологийг дэлхий дахинд тулгамдаж буй томоохон асуудлуудыг шийдвэрлэхэд ашиглахыг шинжлэх ухааны салбарынханд уриалснаар Google компани үүнийг өөрчлөх болно гэж найдаж байна.

Уралдаанд оролцохын тулд багууд өөрсдийн хийхийг хүсэж буй нийгэмд хэрэгцээтэй программаа тайлбарлах ажээ. Мөн зохион бүтээсэн алгоритм нь эцсийн үр дүнд хүрэхээс өмнө квант компьютер дээр хэр удаан ажиллахыг тодорхойлох ёстой. Алгоритмуудыг мөн эерэг нөлөөллийн цар хүрээ, ердийн алгоритмаас хурдан эсэх зэрэг хэд хэдэн үзүүлэлтээр шалгаруулна. 5 сая долларын шагналын сангаас хагас шигшээд шалгарсан 20 оролцогчид тус бүрд 50,000 ам.доллар олгох бол финалд шалгарсан 5 оролцогч 1 сая ам.долларыг хуваан хүртэнэ. Харин уралдаанд ялсан 3 оролцогч үлдсэн гурван сая долларын эзэн болох ажээ.

Эх сурвалж: New Science /МОНЦАМЭ агентлаг/