Францын нийслэл Парис хотын орон гэргүйчүүдийн төлөө тэмцэгчид олимпын наадмыг угтан гудамжуудаа цэвэрлэх ажлын хүрээнд гудамжнаас хөөгдсөн хүмүүсийн дунд эмзэг давхаргын айлууд, хүүхдүүд олон байсан хэмээн хотын захиргааг буруутгаж байна.

Парис хот энэ оны долоодугаар сарын 26-наас наймдугаар сарын 11 хүртэл үргэлжлэх зуны олимпыг угтан хотынхоо өнгө төрхийг сэргээн цэгцэлж байгаа билээ.

Гэвч энэ үйлдлийг нь иргэд сэргээн цэгцлэх биш, өнгөлөн далдалсан хэрэг хэмээн шүүмжилж байгаа юм. Жишээлбэл, хүмүүнлэгийн Медецинс ду Монде байгууллагын эрүүл мэндийн хяналт хариуцсан зохицуулагч Паул Алаузи “Сайн нэр хүртэхийн тулд хогоо хивсэн доогуураа шүүрдэж байна. Хүмүүсийг түр хугацаагаар хотоос гаргаж байна. Хэрэв үнэхээр асуудалд тохирсон зөв шийдэл энэ мөн байсан бол хүмүүс өөрсдөө автобусанд нь чихэлдээд суух байлаа. Гэвч тэгэхгүй байгаа. Ингэснээрээ тэр хүмүүсийн болон тэдэнд тусалдаг хүмүүсийн амьдралыг асар их хүндрүүлж байна” гэжээ.

Мөн Лэ Рэвэрс дэ ла Мэдайллэ хэмээх өөр нэг бүлгэмийнхэн “Парисын ойр орчмын нутгуудаас эрх баригчид “зохимжгүй” гэж үзсэн хүмүүсээ хөөн гаргаж байна. Бид энэ удаагийн олимп өмнөхүүдээсээ өөр болно гэж найдаж байлаа. Гэвч хамгийн эмзэг давхаргынхныгаа дээрэлхсэн, ямар ч олиггүй наадам болох бололтой” гэж ярьжээ.

Эх сурвалжуудын мэдээлж байгаагаар сүүлийн 13 сарын хугацаанд хотын майхан хорооллын нийт 12545 хүнийг албадан нүүлгэсэн гэнэ.

Эх сурвалж: Chinadaily