Конгрессын Төлөөлөгчдийн танхимд улс төрийн мөрдлөгийн аюулын талаар анхааруулан үг хэлсэн аавынхаа ард дэггүйтэн инээдтэй царай гаргасан цэцэрлэгийн насны хүүгийн бичлэг цахим орчинд тархаж, олны анхаарлын төвд оржээ.
Тухайлбал, Теннесси мужийн Бүгд найрамдах намаас сонгогдсон Конгрессын гишүүн Жон Роуз энэ даваа гарагт Ерөнхийлөгч асан Поналд Трампын хэрэгтэй холбоотой илтгэл тавьжээ. Харин түүний индрийн арын суудал дээр цэцэрлэг нь амраад аавынхаа ажил дээр дагаж ирсэн зургаан настай хүү Гая нь сууж байлаа. Харин Роузын эхнэр Челси бага хүүгээ хараад Теннессид үлдсэн аж.
Эхэндээ Гая тэвчэртэй, томоотой сууж байсан ч камер бичиж байгааг анзаараад дэггүйтэж эхэлжээ. Тэрээр аавынхаа ард хэлээ гаргаж, ярзайж, нүдээ янз бүр болгож үзэв. Бараг нэг минутыг дараа түүнийг хажуунаас нь өөр хүн татан холдуулсан юм. Гая аавынхаа илтгэлийг дуустал камерт үзэгдэхгүй суудалд томоотой суусан гэнэ.
Хожим нь Роуз “Дүүгийнх нь зургийг авах гээд аргаа барахад Гая маань ингэж дүүгээ инээлгэдэг юм” хэмээн ярьжээ.
Эх сурвалж: RT