![](c/2406/NC-2BX6H7Z-HWL5D5E-93V303P-X6.jpg)
Дэлхий даяар олон орны хүмүүс мэдээ мэдээллийг хар бараан, муу муухай, уйтгартай гэх мэт шалтгаанаар уншихаас зориуд татгалзах нь олширчээ.
Оксфордын их сургуулийн судлаачдын тооцоолсноор 2017 онд судалгаанд оролцогчдын 29 хувь нь мэдээ мэдээллээс хэргээр зайгаа барьдаг гэж байсан бол энэ тоо өдгөө арван хүн тутмын дөрөв буюу 39 хувьд хүрчээ. Энэ бол түүхэнд байгаагүй хамгийн өндөр тоо гэнэ.
Судлаачдын үзэж байгаагаар хүмүүс улам олноороо мэдээнээс зайлсхийх болсонд Украин, Ойрхи Дорондод болж буй дайн тулаанууд гол нөлөө үзүүлж байгаа бололтой.
Судалгааг нийт 47 орны насанд хүрсэн 94943 хүнээс авчээ. Олон оронд сонгууль өрнөж байгаагаас шалтгаалан сонгуультай холбоотой мэдээнүүдийн хандалт мэдэгдэхүйц өсөж байгаа ч нийт мэдээний хандалтуудыг тооцоод үзэхэд аажмаар тогтмол буурах хандлагатай байгаа аж.
Мөн 2017 онд судалгаанд оролцон хүмүүсийн 63 хувь нь мэдээ мэдээллийг тун идэвхтэй уншдаг гэж байсан бол өдгөө ердөө 46 хувь болтлоо буурсан байна. Ялангуяа ИБУИНВУ-д энэ тоо хоёр дахин буурчээ.
Түүнээс гадна хүмүүсийн мэдээнд итгэх итгэл цар тахлын үеэс хойш дөрвөн хувиар буурч 40 хувь болсон байна.
Эх сурвалж: BBC