Гондурасын Ерөнхийлөгч асан 55 настай Хуан Орландо Хернандез хар тамхи тээвэрлэсэн хэргээр АНУ-ын шүүхээс найман сая ам.долларын торгууль, 45 жил хорих ял сонслоо.

Тухайлбал, энэ оны гуравдугаар сард Нью-Йоркийн шүүх бүрэлдэхүүн Манхэттаны холбооны шүүх танхимд хоёр долоо хоног хуралдсаны эцэст Хернандезийг гурван ч удаагийн хар тамхи зөөвөрлөсөн хэрэгт гэм буруутайд тооцсон билээ. Гэвч Хернандез өөрийгөө буруугүй хэмээгээд, хилс хэрэг тулгалаа гэж байв.

Харин прокурорууд түүнийг хар тамхины бүлэглэлүүдтэй үгсэн тохиролцож, бүрэн эрхийн хугацаандаа улсаараа дамжуулан АНУ-д 400тонн кокайн оруулж ирсэн бөгөөд хариуд нь хэдэн сая ам.долларын авлига авч, түүнийгээ өөрийн улс төр дэх нөлөөг тэлэхэд зарцуулсан гэж үзэн лхагва гарагт ялын тогтоолыг уншсан байна.

Эх сурвалж: CNN